ठुलो बाढी आयो 
म जोगिएँ।

ठुलो भूकम्प आयो
म बाँचे।

महाको डडेलो लाग्यो
मलाई तातोसम्म लागेन।

मेरो आँगनमै चट्याङ खस्दा 
म तर्सिएन ।

घरमा 
हैजा आयो
दादुरा आयो
औलो आयो
कोरोना आयो
जे जे आयो मदेखि डरायो।

किनकि 
मसँग मेरा बा थिए ।

आज 
पानी पर्दा डराउँछु
आकास गड्किदा कराउँछु
सम्झन्छु भविष्य हराउँछु।

रित्तिदै गरेको 
चामलको थैलाको आवाजले तर्सिन्छु
नुन हाल्ने ग्यालिनको आवाजले तर्सिन्छु
कैले बादलझैं मडारिन्छु
कैले बर्षाझैं बर्षिन्छु
जुन दिनदेखि म बा भएँ ।