काठमाण्डौं। भिजिट भिसा प्रकरणमा नाम जोडिएपछि गृहमन्त्री रमेश लेखकले आज इन्कारी प्रस्टीकरण दिए। प्रतिनिधिसभामा विपक्षीको अवरोधले बोल्न नपाएका उनी पत्रकार सम्मेलन गर्दै उन्मुक्तिको सन्देश दिए। 

लाखौ रुपैयाँ ठगिने गरेको आरोपमा उनले एक मात्र प्रष्टिकरणको शब्द थियो, कर्मचारी जोडिदैमा मन्त्री पनि हो भन्नु गलत हो। पत्रकार सम्मेलनभर उनले यिनै शब्दमार्फत आफू सोही प्रकरणमा नरहेको दाबी गरे। यसका बाबजुत विवादित र अख्तियारको छानबिनमा परेका त्रिभुवन विमानस्थल अध्यागमन कार्यालयका निर्देशक तीर्थ भट्टराईको सरुवाका सन्दर्भमा अन्य गृहमन्त्रीको समेत नाम लिँदै आफू मात्र कारबाहीको भागिदार नहुने जनाए। निर्देशक  भट्टराई तिनै व्यक्ति हुन्, जो अख्यिारको छापामा परेको अघिल्लो दिन मात्र सरुवा भएको थियो। 

जुन सरुवा गृहमन्त्री लेखकले  गराएका थिए। उनले यसबारे प्रष्टिकरण दिँदा अन्य ५ साविकका गृहमन्त्रीको नाम जोडे। सरुवा गर्दैमा गलत हुने भए अन्य गृहमन्त्री पनि पर्ने उनको भनाइको आशय थियो।  लेखकले भट्टराईलाई २०७७ सालमा तत्कालीन गृहमन्त्री रामबहादुर थापा बादलको पालामा गृह मन्त्रालयबाट गोरखा र त्यसपछि महोत्तरीको प्रमुख जिल्ला अधिकारी बनाइएको स्मरण गराए ।

त्यस्तै भट्टराईलाई २०७८ सालमा बालकृष्ण खाण गृहमन्त्री भएका बेला गृह मन्त्रालय अन्तर्गत पन्जिकरण विभागको महानिर्देशक बनाइएको र सोही वर्ष मोरङको सिडिओ बनाइएको बताए । २०७९ सालमा प्रचण्डले गृहमन्त्रीको समेत कार्यभार सम्हालेको बेला गृह मन्त्रालयमा ल्याइएको र नारायणकाजी श्रेष्ठ गृहमन्त्री हुन्जेल उनी सोही विभागका रहेको बताए।

त्यसपछि रवि लामिछाने गृहमन्त्री भएका बेला भट्टराईलाई २०८० साउन ४ गते हेटौंडास्थित मुख्यमन्त्री कार्यालयबाट गृहमा ल्याइएको लेखकले बताए ।उनले आफू गृहमन्त्री भएर आउँदा उनी कसूरजन्य सम्पत्ति व्यवस्थापन विभागको महानिर्देशक रहेको बताए । लेखकले एउटा कर्मचारीमाथि अनुसन्धान हुँदा मन्त्रीले राजीनामा दिने हो भने कोही मन्त्री नै बाँकी नरहेको बताए।