काठमाण्डौ । नेपाली कांग्रेसका महामन्त्री एवम् पूर्वमन्त्री गगन थापाले अदालतको अवहेलना मुद्दामा बुधबार अधिवक्ता अमृतकुमार केसी मार्फत सर्वोच्च अदालतमा लिखित जवाफ पेस गरेका छन् । थापाले अधिवक्ता केसीमार्फत पठाएको जवाफमा अभिव्यक्ति स्वतन्त्रता निरपेक्ष हुन नसक्ने तर अभिव्यक्ति स्वतन्त्रता कुण्ठित वा सङ्कुचन पनि गर्न नपाइने उल्लेख गरिएको छ ।

स्वस्थ आलोचनाले अदालतको प्रतिष्ठामा आँच पुर्‍याउने एवम् अदालतको अधिकारलाई चुनौती दिने नभई यसले न्यायिक जबाफदेहिता सुनिश्चित गर्न मद्दत पुर्‍याउने जवाफमा उल्लेख छ । यस्तै लिखित जवाफमा अवहेलनाको निवेदन सारतः खारेज भागी रहेको उल्लेख छ ।

थापाले वैशाख ११ गते ५२ संवैधानिक नियुक्तिसम्बन्धी मुद्दा किनारा नलगाएर सर्वोच्चले डिल गरिरहेको आरोप लगाएको अभिव्यक्तिविरुद्ध अधिवक्ताहरू विशाल थापा, अनन्तराज लुइँटेल र प्रतिभा उप्रेतीले सर्वोच्चमा अदालतको अवहेलनासम्बन्धी मुद्दा दायर गरेका थिए ।

न्यायाधीश द्वेय सपना मल्ल प्रधान र नित्यानन्द पाण्डेयको इजलासले वैशाख १६ गते थापासँग लिखित जवाफ माग गर्ने आदेश गरेको थियो ।